Струга го потврди Алтипармаковски како големо засилување во нападот (Фото)

Струга Трим Лум ги засука ракавите и напорно работи во изработката на ростерот за наредната натпреварувачка сезона, па откако вчера му беше продолжен договорот на Нијаз Лена, денеска пристигна потврда за големо засилување.

Ветеранот Лена е еден од најважните играчи за Струга и вчера се обврза на соработка за уште една година, но од денес, тимот ќе биде посилен и за Марјан Алтипармаковски.

Искусниот напаѓач пристигнува во Струга како големо засилување за новата натпреварувачка сезона, бидејќи како екс младински репрезентативец и неколкугодишен интернационалец дефинитивно има што да понуди на домашната сцена.

Алтипармаковски кој потекнува од фудбалската школа на Пелистер во изминатиот период ја санираше повредата која ја имаше пред корона паузата, а со клубот од Струга потпиша едногодишен договор.