Силекс ја шокираше Шкендија во пенал рулетот, „пандевци“ го елиминираа Шкупи

Натпреварот меѓу Силекс и Шкендија во Кратово го оправда епитетот на дерби и највозбудлив во четвртфиналето на македонскиот Куп, бидејќи откако победникот не можеше да биде решен во регуларниот дел, решаваше пенал рулетот.

Во еден крајно тврд дуел во кој Шкендија на крајот може повеќе да жали што не постигна гол во второто полувреме, на крајот повеќе среќа, но и повеќе нерви имаа домаќините од Кратово кои ги искористија пандемските нови услови според кои веднаш се оди на изведување пенали.

Силекс имаше четири прецизни реализатори, а во неуспехот од 4:2, трагичари за Шкендија беа Тотре и Ибраими кои не ги реализираа своите пенали.

Покрај Шкендија, во полуфиналето нема да гледаме уште еден изразит фаворит, тимот на Шкупи кој ова попладне беше елиминиран во четвртфиналето од Академија Пандев.

Струмичани имаат многу проблеми на стартот на новата сезона во Првата македонската фудаблска лига, но денеска истите ги оставија зад себе и по победата над Пелистер, сега славеа голем триумф и над Шкупи од 2:1.

На останатите две четвртинални пресметки, Струга Трим и Лум ја победи Ренова со 1:0, додека Македонија Ѓорче Петров ја потврди одличната форма и ја декласираше Беласица со 1:4.