Што значи прекинот на првенството во фудбал и што ќе следува?

Целокупната епидемиолошка ситуација во земјата и фактот дека бројот на новозаболени секојдневно се зголемува, беа доволна причина за УО на ФФМ да се произјасни позитивно предлогот на Комисијата за натпреварување.

Со вака прогласениот прекин на натпреварувачката сезона 2019/2020 во Прва МФЛ и натпреварувањето во Купот на Македонија, воедно ФФМ одлучува за оваа сезона да не биде прогласен шампион поради „вишата сила“ која ги прекина и сите други спортски натпреварувања во државата.

Очекувано, ФК Вардар кој ја заврши полусезоната со фантастичен успех и направи дистанца од останатите со која се пофали на почетокот од кризата, ќе има за што да жали. Но, реалноста отсликана посебно во последните неколку денови, околу ситуацијата со позитивните тестови на вирусот Covid-19, каде што освен поразителните бројки на државно ниво, беа објавени и дузина позитивни наоди меѓу фудбалерите од ФК Ренова и ФК Шкендија, значи дека нема услови за доигрување.

Целиот тим на ФК Ренова мора да мине две седмици во изолација, а во вакви вонредни услови, земајќи го во предвид и ограничувањето на движење, клубовите не можат да го продолжат тренинг процесот пропишан во здравствениот протокол.

Според последните информации од ФФМ, процесот на лиценцирање е се уште во тек, а потоа ќе се одредат и екипите кои ќе играат во европските купови.