Мукаетов го најави ракометниот спектакл: Овие горди Македонци секогаш даваа се од себе за репрезентацијата

Ракометната Федерација на Македонија денеска го одржа најавениот прес за големиот ракометен спектакл кој ќе се одржи на стартот на 2023-та година, настан кој ќе има и хуманитарна цел.

Големите ракометни ѕвезди кои одбележаа една ера во македонската репрезентација ќе ги одмерат силите против актуелните репрезентативци на настанот насловен „Сите ѕвезди“, а кој денеска и официјално беше претставен од страна на првиот човек на Федерацијата, Живко Мукаетов.

Околу 20 македонски пензионирани играчи ќе бидат дел од настанот со ракометно-музички карактер, од кој покрај големите ракометни имиња, ќе бидат дел и Сашко Коцев, Дац и Александар, Кики, Некст тајм и Меморија.

– Јас полека влегувам во десеттата година од мојот мандат во РФМ. Голем број од овие играчи кои се пензионираа ги фатив во зенитот на кариерите и добар дел веќе не се активни. На нивно место дојдоа нови играчи, нови генерации. Младите ги заменија нивните идоли во репрезентацијата.

– Ова ќе биде одлична можност да им се заблагодариме на 20 Македонци кои со полно срце, посветеност и страст ги бранеа боите на Македонија. Ракометарите заслужуваат и повеќе, поради Ковид не можевме порано да го организираме овој настан. Ги поканувам сите да дојдат, им се заблагодарувам и на уметниците кои ни се приклучија на овој настан. Настанот ќе има хуманитарна цел, сите средства ќе бидат донирани во СОС „Детското село“. Целта е да собереме околу еден милиони денари, се надевам дека цела сала ќе биде полна, – изјави Мукаетов.

Ревијалниот натпревар меѓу легендите и актуелните репрезентативци ќе се одигра на 3-ти јануари во „Борис Трајковски“, а стартот на мечот е закажан за 19:00 часот.