Ѓоковиќ ги „олади“ организаторите: Протоколот за Ју-Ес Опен е екстремен

Светскиот рекет број еден, Новак Ѓоковиќ, денеска испрати порака до организаторите на Ју-Ес Опен, нарекувајќи го нивниот предвиден протокол како премногу екстремен.

Тенискиот грен-слем кој треба да започне на крајот на август и тоа без присуство на публика, но Ѓоковиќ како актуелен претседател на АТП советот на играчи навести дека тенисерите не се премногу расположени да играат по новите правила на организаторите.

„Тајмс“ веќе објави дека планот е да биде испратен по еден чартер лет на секој континент, играчите да имаат направено тест со негативен резултат и притоа ќе можат да бидат придружувани само од еден тренер.

– Нема да имаме пристап до Менхетн, ќе спиеме во хотелите на аеродромите и ќе треба да се тестираме два-три пати неделно.

– Исто така, ќе ни биде дозволено присуство само на еден тренер, што е навистина невозможно. Покрај тренер, потребен ни е фитнес тренер, физиотерапевт и слично.

– Зборував со одговорните, но не знам дали турнирот ќе се одржи, бидејќи условите кои ги налагаат се премногу екстремни, – изјавил Ѓоковиќ.