Техничките грешки и пресудија на Хрватска во пресметката со Франција

Втората фаза на Европското првенство носи многу поквалитетни дуели од оние кои ги гледавме во првата, а денеска на програмата беше големото дерби кое веќе деценија наназад е дел од сите големи турнири.

Хрватска има смена на генерации и веќе не важи за селекција која брка медали на најважните шампионати, па тимот кој сега е предводен од Перковац повторно не ја мина пречката со која имаа мака и многу посилни состави како што беше оној на Червар.

Франција повторно доби еден дуел со Хрватска во кој успеаваше да го диктира темпото во текот на сите 60 минути, по што слободно може да се каже дека беше подобра за гол или два како што беше и на крајот од мечот.

Иако постојано беше блиску до ривалот, Хрватска правеше почетнички грешки во моментите кога требаше да направи дополнителен притисок врз „триколорите“, а двоцифрениот број на технички грешки на крајот беа пресудни за поразот.

Французите победија со 34:32 и ги запишаа првите два бода во втората фаза, со што автоматски избија на првото место со вкупно четири.