Пелистер го скрши мразот во СЕХА и ја победи Војводина

Ракометарите на Еурофарм Пелистер го скршија мразот и ја запишаа првата победа во новата СЕХА лига, откако вечерва на домашен терен и се реваншираа на Војводина.

Поради двата стартни порази и лошите резултати во Европа, атмосферата во Битола денеска беше доста жешка на почетокот и навивачите им порачаа на ракометарите дека добиле „жолт картон“, што на крајот се одрази позитивно врз играта на тимот кој го предводи Валтер.

Домашниот тим почна фуриозно и го диктираше темпото од самиот старт, успеа да поведе со 6:1, а тоа беше навистина добра најава за прва победа во третото коло во регионалното натпреварување.

Војводина успеа да одговори и резултатски да се приближи во првото полувреме до 14:12, во два наврати дојде и на само минус еден во вториот дел, но на крајот загуби со 30:25.

Кисум со девет гола беше најдобар поединец во редовите на Пелистер, Дејвис постигна седум, додека кај гостите се истакна Ковачевиќ со осум погодоци.