Надал пред првиот предизвик во Барселона: Во животот секогаш има почеток и крај…

Рафаел Надал по вторпат ќе настапи во 2024-та година и тоа ќе го направи на еден од најомилените турнири во својата кариера, оној во Барселона кој го чувствува како свој домашен.

Шпанскиот тенисер се повреди на турнирот во Бризбејн и поради мускулна повреда го пропушти Аустралијан Опен, па иако истата брзо ја санираше, потоа направи нова неочекувана пауза поради физички проблеми при сервирање.

Надал ја прескокна цела американска турнеја и го откажа настапот и во Монте Карло, но сега ќе игра во Барселона и денеска даде изјава на официјалниот прес пред мечот со Флавио Коболи во првото коло.

– За мене е вистински подарок што сум тука и што ќе играм во Барселона. Го сфаќам ова како да е моја последна година во кариерата. Сакам да уживам во секој момент. Во животот секогаш има почеток и крај…..

– Јас одам ден по ден, не си поставувам цели, ќе влезам на овој турнир со мисли како да е мој последен настап во Барселона. Ќе се обидам да бидам конкурентен и да го дадам најдоброто од себе. Нема да излезам на теренот и да чекам проштален меч, ќе излезам максимално на теренот и ќе видиме од каде ќе стигнам.

– Има многу денови кога се чувствувам добро, но има и лоши. Затоа одам ден по ден. Добрите денови ме тераат да продолжам и да не се откажам. Затоа се уште сакам да играм, се уште имам страст за оваа игра, – изјави Надал.