Мукаетов: Големо благодарам до ЕХФ за довербата, се надевам соработката ќе продолжи и во иднина

Македонија беше еден од ко-домаќините на Европското првенство, па денеска првиот човек на РФМ, Живко Мукаетов заедно со останатите претседатели на федерациите имаа пресконференција во Љубљана на која го изразија своето задоволство од организираниот шампионат.

-После 5 европски и 3 светски младински првенства организирани од 2013та наваму, особено ми е драго што после 10 години пауза, го имавме нашиот женски сениорски тим на големо Европско натпреварување. Би сакал да се заблагодарам на сите кои беа вклучени во овој проект: вредните волонтери, тимот во нашата Федерација, партнерите од доверба, нашите поддржувачи – сите кои веруваа дека можеме да износиме ваков голем проект. Посебна благодарност, би сакал да упатам до македонските медиуми за безрезервната поддршка, како и на Европската ракометна федерација која ни довери една ваква голема организација, а се надевам дека оваа взаемна доверба и соработка ќе продолжат и во иднина, -истакна Мукаетов во своето обраќање.

Претседателите на трите федерации ко-организатори на WOMENS EHF EURO 2022 го предадоа организаторското ЕХФ знаме на ко-организаторите на WOMENS EHF EURO 2024 чии домаќини ќе бидат Унгарија, Австрија и Швајцарија.