Ковид-19 повторно прави проблеми во Италија, одложен еден натпревар од Серија А

Третиот бран на коронавирусот во Европа повторно почна да прави сериозни проблеми на фудбалските терени.

Голем дел од играчите повторно почнаа да покажуваат позитивни тестови, па така клубовите и лигите се приморани да одложуваат натпревари.

Таков е случајот со натпреварот кој требаше да се одигра помеѓу Интер и Сасуоло овој викенд. Средбата е одложена откако коронавирусот сериозно навлезе во редовите на Интер.

Веќе се потврдени позитивните тестови на Стефан де Фрај, Матијас Весино, Данило Дамбросио и Самир Хандановиќ, па од клубот побараа и добија одложување на средбата со Сасуоло.

Дополнително од Интер нема да им дозволат на своите фудбалери да патуваат на репрезентативните обврски во пресрет на квалификациите за Светското првенство во Катар.