Гатузо доби ултиматум, Наполи веќе му спрема замена

Составот на Наполи игра доста променливо во Серија А и поради тоа има девет бода помалку од актуелниот лидер на табелата Милан.

Наполитанците знаат да кикснат против екипи кои реално според квалитетот мора да ги добијат, па така на пример загубија дома од Специја со 2-1, додека минатиов викенд беа поразени од Верона со 3-1 иако уште во првата минута дојдоа во водство.

Поради ова се зголемува притисокот врз тренерот Џенаро Гатузо и според италијанските медиуми претседателот Аурелио Де Лаурентис бара реакција, резултати или во спротивност може да заработи отказ.

Наводно иднината на Рино зависи од трите наредни средби во кои Наполи прво игра против Специја во Купот, а потоа со Парма и Џенова во Серија А.

Во исто време пак „Кориере Дело Спорт“ пишува дека Де Лаурентис веќе разговарал со искусниот шпански стручњак Рафаел Бенитез кој во моментов е слободен откако ја заврши приказната во Кина.