Галтие со моќни зборови ја потврди разделбата со Меси

Повеќе од јасно беше дека Лионел Меси си оди од ПСЖ по крајот на актуелната натпреварувачка сезона, па сега тоа го потврди и тренерот на ПСЖ, Кристоф Галтие.

Искусниот фудбалски стручњак се уште не е запознаен со својата иднина и не знае дали ќе остане во Париз и наредната сезона, но сепак знае дека Аргентинецот си оди од „Паркот на принцовите“ и не ја продолжува соработката.

Меси повторно е слободен агент и може да потпише со било кој клуб, па иако интересот од Барселона е навистина голем, постои огромна веројатност на крајот да заврши во Саудиска Арабија.

– Точно е, Меси си оди. Имав привилегија да го тренирам најдобриот играч во историјата на фудбалот. Оваа сабота ќе го одигра последниот натпревар на „Паркот на принцовите“ и очекувам да биде пречекан како што доликува и заслужува.

– Оваа сезона беше клучен фактор во тимот, постојано стоеше на располагање. Ниту една од критиките не се оправдани. Имаше мундијал на средина на сезоната, а неговата статистика вели дека има над 20 гола и над 20 асистенции. Беше привилегија да го тренирам оваа сезона, – изјави Галтие пред мечот со Клермон.