Беретини: Му се јавив на Ѓоковиќ и му нагласив дека не давам пари

Новак Ѓоковиќ беше иницијатор на предлогот првите 100 тенисери на АТП листата да исплатат пари за послабо рангираните и да им помогнат во овие тешки времиња кога не се игра тенис, но истиот наиде и на доста опструкции и тоа од доста познати имиња.

Доминик Тим јавно се противеше на ваквиот предлог од светскиот рекет број еден и даде неколку објаснувања зошто нема да им помага на своите колеги кои не заработуваат никакви пари во овие тешки времиња, а сега се јави и Италијанецот Матео Беретини.

Корпулентниот тенисер од Рим е осми на АТП листата во овој момент, а како таков, вели дека му објаснил на Ноле зошто нема да донира за тенисерите.

– Му се јавив на Ѓоковиќ и му ја објаснив мојата ситуација. Му кажав дека имам други приоритети и дека мојот план е да им помогнам на семејствата кои се најпогодени од коронавирусот. Сакам да им помогнам на оние кои останаа без работа. Тој ја сфати мојата страна и порача дека тенисерите не се обврзани да го проследат неговиот предлог.

– Јас си имам мое мислење и стојам зад тоа. Во еден професионален спорт, не треба спортистите да им помагаат на другите. За тоа се одговорните тела, во овој случај АТП, ВТА и ИТФ. Тие ги организираат турнирите, нивна одговорност е да се грижат за нас, а во ситуацијава за оние кои се најпогодени, – нагласи Беретини.