Ангеловски: Секој противник за нас е еднаков на европски шампион, ни фали нешто што со пари не можеме да го купиме

Составот на Еурофарм Пелистер во 9. коло во Лигата на шампионите ќе се соочи со една од најдобрите, најквалитетните екипи во ова натпреварување, полскиот великан Кјелце.

Кјелце предводен од легендарниот Душебајев секогаш има највисоко цели и токму поради ова ќе биде голем тест за македонскиот првак уште еднаш да види до каде е во овој момент. На претходната средба против Пик Сегед, тимот се прикажа во добро светло и малку фалеше да дојде до првиот бод во ЛШ, па водени од таа енергија тренерот Бранко Ангеловски се надева дека ќе го дадат максумумот, а тој ќе биде доволен за добар резултат.

-Екипата на Киелце е составена од голем број на индивидуалци, кои прават огромна слика на колективна игра. Предводени се од еден од најдобрите тренери во светот. Посебна мотивација за Киелце не треба да имаме, бидејќи во Лигата на шампионите за нас секој натпревар мотивира. За нас секој противник е еднаков на европски шампион. Самиот факт дека парираме во одреден дел од натпреварот за нас е успех. Ни фали нешто што со пари не можеме да го купиме, а тоа е времето. Сигурен сум дека овие натпревари ќе донесат искуство за моите ракометари и во понатамошниот дел на сезоната ќе играме на повисоко ниво и ќе ја радуваат нашата јавност и верните симпатизери.