Алфа Ромео ги потврди возачите за сезоната во која тимот ќе настапува под друго име

Актуелниот Формула 1 тим на Алфа Ромео реши да ја задржи актуелната возачка постава, па и следната сезона ќе смета на Валтери Ботас и Жу Гунју.

Финецот имаше договор на уште една сезона и неговото останување на беше под знак прашање, но сега се решени дилемите и во однос на Жу, кој ќе добие дополнителна сезона да ги покаже своите возачки квалитети.

Овој тим ја вози последната сезона под името Алфа Ромео, бидејќи Заубер ја завршува соработката со италијанскиот бренд, а засега се уште не е познато под кое име ќе настапува следната година.

Ауди ќе биде нов косопственик на тимот, но своето деби го најави за 2026 година и дотогаш нема да инсистира на користење на својот бренд во однос на именувањето на наследникот на Алфа Ромео.

Ботас и Жу имаат потпросечна сезона во која се на деветтото место од десет клубови, на осум трки до крајот на првенството.