Алегри си постави нова цел по бомбастичниот ангажман на Влаховиќ

Масимилијано Алегри доста често беше разочаран од изгледот на неговиот Јувентус во првиот дел од сезоната и многупати нагласи дека реалноста на Јуве е средината на табелата, нешто што сега драстично се менува по акцијата која ја презема клубот на трансфер пазарот.

Јувентус се ослободи од Рамзи, Кулушевски и Бентанкур, но ги ангажираше Душан Влаховиќ и Денис Закарија, со тоа што Србинот се претвори во топ тема поради висината на отштетата која и беше платена на Фиорентина.

Во трансфер кој може да достигне и 80 милиони евра, Влаховиќ стана најскапо платен играч во јануари во фудбалската историја во Италија, но Алегри се обиде да го симне товорат од 22-годишниот напаѓач кој стана топ тема на Апенините.

– Клубот направи фантастична работа со два важни играчи. Влаховиќ постигна многу голови за Фиорентина и играч со такви карактеристики немавме во тимот. Заедно со Халанд, тој е најталентиран напаѓач во Европа. Со него и Закарија сега растат амбициите. Целта е да бидеме во топ четири на крајот од сезоната, следи најважниот дел од шампионатот и веќе немаме право на грешки.

– Со доаѓањето на Влаховиќ, одговорноста треба да биде распределена подеднакво кон сите. Не треба да се потпираме само на Влаховиќ. Тој има 22 години, постигна многу голови и сега сака да му оди добро во Јувентус. Но, одговорност треба да имаат сите, не само Влаховиќ како најголемо засилување. Потребно е да имаме баланс и да не ја префрлиме одговорноста само кон него, – вели Алегри пред мечот со Верона кој се игра утревечер.