Шкупи го победи Силекс и го презема врвот на табелата

По неочекуваниот пораз од Струга, Шкупи значително ја подигна формата и ова попладне стигна до третата победа во низа во домашното првенство, со што сигурно ќе преноќи како лидер на табелата во Првата македонска фудбалска лига.

Скопскиот тим ја оправда минималната фаворитска улога која ја имаше во дуелот со Силекс, откако на стадионот во Чаир ја претвори во гол својата најдобра шанса на натпреварот.

Во еден изедначен натпревар, на крајот пресуди еден постигнат гол, а истиот беше дело на Исени на стартот на вториот дел, или поточно во 58-та минута.

По враќањето на Умит Каран на тренерската позиција, Шкупи дефинитивно делува како поинаков тим и позитивната серија беше продолжена и денеска, а со новите три бода, тимот од Чаир сега е на врвот на табелата, пред Шкендија која утре го игра својот дуел.

Од друга страна пак, Силекс продолжи со своите променливи изданија и игрите „топло-ладно“, па по 10 одиграни кола и 14 освоени бода го зазема 5-то место.