Прелчец не успеа да го совлада фантастичниот Јовановски, Академија го победи разиграниот Работнички

Работнички на фантастичен начин го започна пролетниот дел од сезоната и со биланс од две победи и две реми средби влезе во дуелот со Академија Пандев, но денеска го претрпе првиот пораз по враќањето на тренерот Влахо.

„Романтичарите“ пред точно еден месец ја победија Академија Пандев на снежниот и замрзнат терен во Струмица, но денеска „пандевци“ успеаја да се реваншираат за тој пораз и извојуваа многу важна победа за избегнување на опасната зона во Првата македонската фудбалска лига.

Гостите од Струмица денеска беа без својот прв тренер Васоски кој имаше позитивен тест на Ковид 19, а тоа на фудбалерите како да им даде сила да одиграат за него, а особено голманот Јовановски кој беше херој на гостувањето во Скопје.

Крстовски погоди за 0:1 во 11-та минута и најави дека гостите се дојдени по целиот плен во престолнината, но тоа се случи благодарение на бравурозните одбрани на Јовановски кој до крајот на првиот дел на двапати го сопре Лука Станковски, а му одбрани и пенал на Прелчец пред да се замина на пауза.

Во вториот дел, Академија отвори подобро, ја погоди гредата, но потоа следеше нов налет на Работнички кој откако не вроди со плод, им остави простор на гостите кои преку Велиновски ги поставија конечните 0:2 на „Тодор Проески“.