Одлична партија за нов успех во кариерата: Ѓоргиев ja освои шампионската титула во Словенија

Македонскиот репрезентативец, Никола Ѓоргиев прокнижи уште еден успех во својата кариера и стана шампион на Словенија со АЦХ Волеј Љубљана.

Овој тим по третпат во низа беше подобар од Калцит Волеј и со резултат од 3-0 ја заврши оваа финална серија за 18. пехар во шампионатот. Клубот од Љубљана во последната битка славеше со 3-0 во сетови со 25/18, 25/20 и 25/21 што беше доволно за перфектен крај на сезоната, освоен пехар без ниту еден загубен меч.

Најдобар беше токму нашиот ас со 18 поени, додека двоцифрен беше и Покершник со 11 поени. Кај поразените најистакнат поединец беше Павловиќ со 11 поени.

Претходно Никола и компанија беа најдобри и во Купот, а не треба да се заборави ниту пехарот во МЕВЗА лигата.