Наинголан реагираше по измислената изјава со која наводно го провоцира Роналдо

Раџа Наинголан не успеа да го спаси својот Калјари од убедлив пораз од Јувентус на Сардинија, а по средбата на социјалните мрежи почна да кружи наводна негова изјава, со која испраќа провокација до противникот и пред се Кристијано Роналдо.

Белгиецот кој никогаш не го „галел“ Јувентус со своите изјави, овој пат решил да реагира бидејќи изјавата била измислена и тој сметал дека мора да ја демантира.

– Роналдо е среќен бидејќи ја спаси сезоната постигнувајќи хет-трик против екипата која е четврта одзади на табелата и има примено 46 голови. Штета што головите не ги постигна против Порто, па сега ќе гледа Лига на шампиони во својата дневна соба, – е измислената изјава која кружеше меѓу анти-јуве фановите на социјалните мрежи.

Наинголан објавил стори со истата, а потоа уште едно, со кое ја објаснил ситуацијата.

– Од каде да почнам, сега луѓето ќе го стават моето име под некоја реченица и тоа станува моја изјава? Претеравте.

– Како би можело да зборувам на таков начин за позицијата и бројот на голови примени од Калјари. Престанете со глупостите. А за шампиони како него (Роналдо) имам само респект, затоа доста со измислени работи, – напишал Наинголан.