Крстевски: Ги знаеме противниците, имаме состав кој може да донесе добар резултат

Најдобрата македонска кошаркарска репрезентација ги започна подготовките за претквалификацискиот турнир во Скопје во кој силите ќе ги одмериме со Словачка и Швајцарија.

Турнирот ќе се игра од 12. до 18.август, а нашата цел е секако успех во овие претквалификации за Светското првенство. Нашиот состав е изменет, фалат неколку важни играчи, па во нивно отсуство посериозна улога би требало да има Бојан Крстевски.

Членот на МЗТ Скопје е позитивно расположен и е оптимист во врска со претстојниот циклус.

-Лесно сигурно нема да биде, никогаш ништо не е лесно. Сепак, имаме четири недели за подготовки, ќе одиме и во Маврово. Ова е комбиниран состав, имаме неколку млади кошаркари, неколку повозрасни и сметам дека ваквата комбинација може да донесе добар резултат во овие претквалификации, -вели Бојан и додава:

-Ги знаеме противниците, игравме со нив во едни претквалификации, но сега нашиот состав е доста изменет. И покрај тоа, имаме квалитет да освоивме едно од првите две места и да продолжиме во квалификациите, -заклучи Крстевски кој ги покрива позициите четири и пет.