УФЦ доби нова ѕвезда: Гејтџи го изобличи Фергусон и го предизвика Нурмагомедов (Видео)

Коронавирусот откажа неколку спектакуларни борби во УФЦ шампионатот, но сепак изминатава ноќ вљубениците во овој спорт беа сведоци на неколку фантастични битки, од кои за крај беше онаа закажаната меѓу Џастин Гејтџи и Тони Фергусон.

Спектаклот во Флорида не беше комплетен бидејќи на трибините немаше публика, но оваа атмосфера повеќе му годеше на Гејтџи кој направи огромно изненадување и буквално го претепа човекот кој беше предизвикувач на Нурмагомедов. Таа борба беше откажана поради пандемијата, но сега се покажа дека Фергусон е далеку од сериозен предизвикувач, бидејќи помладиот Гејтџи издоминира во секој поглед.

Во петтата рунда, Фергусон едвај стоеше на нозе и лицето му беше комплетно раскрварено, па судијата мораше да прогласи технички нокаут, одлука која не му се допаѓаше на Тони, но која беше најреална во дадената ситуација.

Џастин на овој начин го „собра“ појасот во лесна категорија, а УФЦ доби нова голема ѕвезда која сега очекува битка токму со Хабиб Нурмагомедов.