Тиквеш приреди шпалир за новиот шампион, во Битола се крена трофејот после 18 години (Фото)

Еурофарм Пелистер си ја обезбеди титулата во домашното првенство со победата која ја оствари над Вардар во „Боро Чурлевски“, но откако и математички го обезбеди трофејот, сега дојде денот за големото славје.

Тиквеш денеска пристигна во Битола само за да биде дел од ревијата на домашниот тим, а со својот џентлменски потег дури и го разубаве чинот кај домаќините, бидејќи новите шампиони беа пречекани од ривалите со победнички шпалир.

Играчите од Кавадарци покажаа класа со потегот пред натпреварот, но потоа не беа дораснат ривал за апсолутниот фаворит и претрпеа тежок пораз на гостувањето.

Еурофарм Пелистер славеше со 35:26 и на најдобар можен начин ја прослави освоената титула, а по крајот на мечот, беше подигнат трофејот кој долго се чекаше во Битола.

После точно 18 години, играчите на Еурофарм Пелистер го вратија трофејот од македонското првенство во Битола, па со ова се стави крај на доминацијата на Вардар кој оваа сезона потфрли во најважните моменти.