Тејтум ја доби лудата битка со Адетокумбо, Милвоки и Бостон ќе играат мајсторка за пласман во конференциското финале (ВИДЕО)

Составот на Бостон Селтик уште еднаш покажа карактер, знаење, упорност, издржливост, цврстина и издвојува победа на гостувањето кај Милвоки Бакс од 108-95, победа со која издејствува мајсторка за пласман во конференциското финале на Истокот.

„Келтите“ не се откажаа и по вторпат во оваа серија го добија шампионот на негов терен, а тоа значи дека ја вратија предноста на домашниот паркет каде во „Ти-Ди Гарден“ ќе имаат можност да дојдат до триумф кој ќе ги одведе на мегдан со Мајами Хит.

Неверојатна партија одигра Тејтум со 46 поени, 9 скока и 4 асистенции, одличен придонес имаше дуото Смарт-Браун кое искомбинира 43 кошеви.

На спротивната страна неа беа доволни ниту 44 поени, 20 скокови и 6 асистенции од Адетокумбо.

Кошаркарите пак на Голден Стејт Вориорс дојдоа до четвртиот „бод“ во дуелот против Мемфис Гризлис и го грабнаа билетот за финалето на Западот (4-2). „Воините“ славеа во Сан Франциско со 110-96 во средба во која во фокусот беа браќата Сплеш со вкупно 59 кошеви.

Прв стрелец кај Гризлис беше Брукс со 30 поени.