Струга ја реши Шкендија во Струмица, Шкупи подобар од Скопје

Поради лошите услови на теренот во Тетово, Шкендија одново играше на „домашен терен“ на друг стадион, а ова попладне во Струмица беше надиграна од страна на најголемото изненадување на стартот на сезоната.

Струга Трим и Лум покажува дека не се шегува и со четвртата победа во воведните четири кола достави кандидатура за шампионска титула, пред се и поради фактот што во нападот го има искусниот Ибраими.

Бесарт денеска и пресуди на „својата“ Шкендија и не го славеше погодокот за конечни 0:2 во Струмица, натпревар кој имаше ваков тек и поради невнимателноста на Цаке.

Играчот на Шкендија доби црвен картон на крајот од првиот дел, па така Струга ја искористи големата предност во вторите 45 минути и со головите на Малески и Ибраими оствари голема победа.

Струга е лидер со 12 освоени бода, но јасно е дека ќе има сериозен конкурент во Шкупи кој победи и на вториот меч во новата сезона. Чаирчани беа ослободени две кола поради европските обврски, а денеска се вратија со нова победа над Скопје во градското дерби.

Шкупи славеше со 0:2, а победа конечно оствари и Работнички по воведните три порази. „Роматичарите“ беа подобри од Тиквеш со 2:0, а триумф оствари и Брегалница над Македонија Ѓорче Петров од 1:0.