Саки му даде поддршка на Пиоли и посочи колку засилувања му се потребни на Милан во летниот преоден рок

Милан се уште има доста сериозни предизвици во актуелнава сезона во која ќе се обиде да ja задржи сегашната позиција на табелата во Серија А, но и да дојде до пехарот во Лига Европа што дефинитивно нема де биде лесна мисија.

Резултатите до крајот на кампањата можат да ја дефинираат и судбината на тренерот Стефано Пиоли кој ќе мора да го извади максимумот од сегашниот тим. Тој често е критикуван поради неконстатноста во игрите, изданијата на „росонерите“ и токму поради ова се е отворено кога е тој во прашање.

Има и такви кои му даваат максимална поддршка, а таков е Ариго Саки кој верува дека Пиоли треба да остане и наредната сезона за која треба да се обезбедат четири засилувања. Саки издвои едно име како освежување, а тоа е Џошуа Зиркзе од Болоња.

-Ако Пиоли остане во Милан како што се надевам, мислам дека ќе сака напаѓач кој се движи и кој е подготвен да се жртвува во фазата без топка. Ќе биде потребно да се донесе многу паметен играч од средниот ред и двајца дефанзивци, стопер и бек, -порача Ариго за „Газета Дело Спорт“.