Новите корона-мерки донесоа проблем: ФФМ го одложи цело фудбалско коло

Откако Владата ги усвои новите предлог мерки од Комисијата за заразни болести по повод одржувањето на спортски активности во нашата земја, денеска со одговор излегоа од натпреварувачката комисија во Фудбалската Федерација на Македонија.

ФФМ ова попладне излезе со официјално соопштение по повод новонастанатата ситуација, информирајќи дека колото кое требаше да се одигра овој викенд, е презакажано за наредниот, со тоа што во меѓувреме ќе треба да се изнајде решение со одговорните луѓе.

Според новите протоколи, секој клуб е задолжен да ги тестира фудбалерите на своја сметка прес секој одигран меч, па очигледно тоа претставува преголем трошок за одреден дел од клубовите, кои по се изгледа ќе бараат бесплатни тестирања од страна на здравствените власти.

– Комисија за натпреварување во рамки на Фудбалската федерација на Македонија информира дека поради измени на Протоколот за спроведување мерки за заштита од „Ковид 19“ и стапување на сила на Општиот Протокол за организирање на натпревари, натпреварите од 11. коло на Прва МФЛ и 10. коло на Втора МФЛ – Исток и Запад кои требаше да се одиграат на 31.10.2020. (сабота) и 01.11.2020. (недела), се одложуваат и истите се пренасочуваат за одигрување на 07.11.2020. (сабота) – 11. коло од Прва МФЛ и 10. коло, Втора МФЛ – Исток и Запад на 08.11.2020 (недела)“, објави ФФМ.