Не доби зелено светло: Ѓоковиќ дефинитивно нема да игра ниту на Мастерсот во Мајами

Новак Ѓоковиќ не е дел од Мастерсот во Индијан Велс, а нема да игра ниту на уште еден турнир од серијата 1000-тоа е оној од Мајами.

Многу напори се направија првиот светски рекет да заигра на оваа сцена, меѓутоа и покрај сите напори од организаторите и од други значајни луѓе Ѓоковиќ не доби посебна дозвола за влез во САД.

-Се обидовме да се направи исклучок за Новак Ѓоковиќ, но тоа не беше можно. Се обидовме, ама не може да игра. Истото се случи и во Индијан Велс каде што знам дека Томи (Хас) направи сé што можеше со своите соработници. Се обидовме да добиеме исклучок Ѓоковиќ е нашиот најуспешен играч, тој триумфираше овде шест пати. За жал, ова не е во моја надлежност, -истакна Џејмс Блејк кој е директор на турнирот во Мајами.

Само за потсетување Србинот не е дел од овие настани затоа што не е вакциниран против коронавирусот, односно САД не прима луѓе кои немаат примено доза против Ковид-19.