МЗТ со серија од 11:0 го скрши отпорот на Работнички и поведе во полуфиналната серија

Работнички победи на теренот кај Гостивар на кој никој немаше победено цела сезона и закажа полуфинална серија со МЗТ Скопје, па иако вечерва беше во игра за нова гостинска победа против шампионот, сепак потеклекна во последниот период.

Тимот од Аеродром покажа шампионски квалитет во најважните моменти и направи разлика кога преостанаа осум минути до крајот, односно кога Работнички дојде на само минус еден.

При резултат 58:57, навистина не се знаеше во кој смер ќе тргне натпреварот, но многу работи станаа појасни откако МЗТ направи серија од 11:0 и зададе клучен удар за победа и водство од 1:0.

Аеродромци комплетно го завторија својот рекет во тие три минути и максимално профитираа во офанзива, па предноста од 69:57 се покажа како недостижна за тимот од Градски парк.

На крајот, натпреварот заврши со резултат 82:71 и така МЗТ поведе со 1:0 пред вториот натпревар кој е закажан за 17-ти мај, а на кој домаќин ќе биде Работнички.

Дамјан Стојановски со 14 поени беше најдобар поентер кај МЗТ, Кук и Вер уфрлија по 13, а еден помалку имаше Војдан Стојановски. Во противничкиот табор, Џелетовиќ постигна 19 поени, а Малешевиќ и Нотиџ по 16.