МВР: Приведени 21 навивач на Левски и Шкупи, повредениот бугарски фан е во стабилна состојба

Македонското Министерството за внатрешни работи излезе со соопштение во кое ги сумираше активностите на полицијата за време на вчерашните инциденти кои се случија пред и за време на фудбалскиот натпревар меѓу Шкупи и Левски.

Двете екипи се сретнаа во Конференциската лига, а инцидентите започнаа уште пред натпреварот, при што еден гостински фан бил прободен со нож и итно префрлен во болница.

МВР ја потврди бројката на приведени навивачи, меѓу кои се и фанови на Шкупи, потврдувајќи и дека повредениот фан е во стабилна состојба.

– На 27.07.2023 година во врска со фудбалскиот натпревар помеѓу екипите на ФК Шкупи од Скопје и ФК Левски од Софија Република Бугарија приведени се 19 навивачи од Република Бугарија, поради нарушување на јавниот ред и мир пред и за време на натпреварот.

Од нив, осум лица за насилство на спортски натпревар, две лица за физички напад на полициски службеници кои вршеле службени дејства, а девет поради агресивно однесување кон нив. По документирање на случајот против нив ќе бидат поднесени соодветни поднесоци.

Околу полноќ полициски службеници од СВР Скопје лишиле од слобода и двајца навивачи на навивачката група на ФК Шкупи, кои го нарушиле јавниот ред и мир со физичка пресметка. И тие се приведени и ќе се соочат со законски предвидените поднесоци.
Во врска со физичкиот напад врз четирите бугарски државјани, за кој во 18.38 часот е пријавено дека се случил на ул.„Цветан Димов“, при што бил употребен и остар предмет до кој бугарскиот државјанин Д.А. се здобил со тешки телесни повреди, по преземени мерки и активности утврден е идентитетот на поголемиот дел од напаѓачите и се расчистува случајот, по што ќе бидат поднесени пријави. Повредениот Д.А. бил пренесен во ГОБ „Св.Наум Охридски“ и е во стабилна состојба, стои во соопштението на МВР.