Мирниот Крос обелодени кои ситуации го разбеснуваат на теренот

Тони Крос во повеќе наврати има откриено дека не планира долга играчка кариера, па една од опциите е да замине во играчка пензија по завршување на актуелниот договор со Реал Мадрид.

Германскиот играч за врска освои се што можеше да се освои и неговиот тековен договор со Реал истекува во 2023-та година, а со своето последно интервју кое го направи за магазинот „Џи-Кју“, уште еднаш ја остави подотворена вратата за такво сценарио, особено поради фактот што сака да ја заврши кариерата на „Сантијаго Бернабеу“.

– Јас нема да завршам во МЛС лигата како други возрасни играчи. Јас имам уште три години од договорот, а во фудбалот три години се многу долги. Јас сакам да го доработам договорот со Реал Мадрид, тогаш ќе имам 33 години и неколку опции на располагање. Да останам во Реал, да се одлучам за нешто друго, или да се пензионирам. Моја цел и желба е да ја завршам кариерата во Реал, – вели Крос.

Германецот на теренот важи како убедливо најсмирен играч на Реал и ретко може да се види како го губи трпението и нервите, но сега одлучи да открие кои ситуации прават да го видиме сосема спротивното светло.

– Вистина е дека во најголем дел од случаите сум смирен. Но, кога имам чувство дека мојот тим е неправедно оштетен од судијата, тогаш знам да го кренам гласот. Неправдата е нешто што многу ме разлутува, исто така многу мразам и да ме лажат. Тие се двете работи кои ме разбеснуваат, подобро е да ја слушнам вистината, колку и таа да е брутална. Но, факт е дека многу потешко се возбудувам и лутам од останатите играчи, – потенцира Крос.