Македонските одбојкари биле гледани од над милион Италијанци во осминафиналето

Македонската одбојкарска репрезентација играше со гордост и чест во своето прво осминафинале на Европските првенства, но судбината посака „спартанците“ да имаат најтежок можен испит.

Светскиот шампион Италија е непосакуван ривал во секоја ситуација, но уште повеќе кога играат на домашен терен, па така македонските одбојкари едноставно немаа што да бараат на гостуваето во Бари.

Италија победи со сигурни 3:0 и единствено понеизвесно беше во првиот сет, во кој нашите репрезентативци покажаа дека неслучајно се најдоа меѓу 16-те најдобри селекции во Европа.

Македонија за првпат беше дел од еден вака елитен нокаут меч, кој донесе и атрактивни бројки кога е во прашање телевизискиот интерес во Италија.

Медиумите од Апенините откриваат дека одбојката е се популарна на „чизмата“, па така мечот меѓу Италија и Македонија го следеле 956 илјади приемници преку „Раи 2“, а уште 135 илјади преку „Скај Спорт“.