Левандовски го посочи играчот на Барса од кој останал најмногу изненаден: Може да биде најдобар на својата позиција

Роберт Левандовски одработи опширно интервју пред „Ел Класико“ дербито кое се игра на „Камп Ноу“, а една од темите кои ги опфати беше и адаптацијата во каталонскиот гигант.

По многу успешни сезони во Баерн Минхен, Леви реши да направи интересен чекор и се одлучи за нов предизвик во кариерата, па откако ја мина почетната фаза во Барселона, полесно е да носи заклучоци за играчите кои ги има во тимот.

Левандовски го посочи Усман Дембеле како играч од кој останал најмногу изненаден во позитивна смисла, потенцирајќи дека тој може да биде најдобро крило во светот доколку биде поштеден од повредите.

– Дембеле е играчот кој ме изненади најмногу откако сум во Барселона, и тоа на позитивен начин. Има талент, квалитет и е многу брз. Може да биде најдобар на својата позиција.

– Според мене, тој веќе е меѓу најдобрите во светот. Понекогаш се повредува, но кога е на теренот, секогаш прави разлика. Може да прави со топката се што ќе посака, има чист талент за фудбал, – вели Левандовски во интервјуто за „Диариос де Бициклета“.