Куман ја доведе во прашање примарната трансфер цел на Лапорта и заклучи: Барселона живее во минатото!

Роналд Куман си замина од Барселона од задната врата и во доста неповолни околности, кои направија легендарниот Холанѓанец да има забелешки за менаџирањето од страна на Жоан Лапорта и неговите први помошници.

Јасно е дека Куман си замина од клубот со нарушен однос со претседателот и самиот не крие дека тоа е така поради јавните постапки на Лапорта, а сега во последното интервју за „Еспорт 3“ си ја отвори душата и даде интересни одговори на повеќе теми.

– Како претседател на еден клуб, секогаш може да се сомневате во квалитетите на еден тренер, но тоа треба да го задржите за себе. Ако тоа го кажувате во јавноста, тогаш се сомнева цел свет во тренерот. Тоа беше големата грешка која ја направи Лапорта.

Во споменатото интервју, Куман ја коментира и примарната трансфер цел на Лапорта, Полјакот Роберт Леванвдовски.

– Да бидам искрен, јас имам големи сомнежи околу тоа. Да платите 50 или 60 милиони евра за играч, плус неговата плата, а тој играч има 34 години. Навистина треба да има сомнежи околу тоа.

– Во мојата ера како тренер на Барса, се обидував да доминирам во играта. Видете, системот со тројца дефанзивци и пет играчи за врска не е дефанзивен. Но, проблемот е што во Барселона се живее во минатото, се живее во времето „тики-така“ со тактиката 4-3-3. Фудбалот се промени, сега фудбалот е многу побрз и технички подобар. Некогаш ги имавме Чави, Иниеста и Меси, а сега не. Заминувањето на Меси беше голем удар, – потенцира Куман.