Ибиши ќе му биде десна рака на Скендеровски во футсал репрезентацијата на Македонија

Поранешниот член на Железарец, Бамбо Приштина, Јувентус Серава, албанска Едро Валона, Шкупи, Беса и Приштина Мабетекс, Орхан Ибиши ќе му биде асистент на Васко Скендеровски во футсал репрезентацијата на Македонија.

Ибиши е среќен што ќе има можност повторно да соработува со Скендеровски и се надева сите заедно ќе можеме да се радуваме на успеси на националниот тим.

-Најпрвин сакам да ја изразам мојата благодарност до Фудбалската федераија на Македонија за укажаната шанса да бидам дел од стручниот штаб во А футсал репрезентацијата. Убеден сум дека ќе имаме одлична соработка со селекторот Скендеровски. Заедно работевме во Железарец, освојувавме трофеи, бевме дел од Лигата на Шампиони и се надевам дека таа енергија ќе ја пренесеме и во заедничка работа со А селекцијата.

– Уште повеќе што со играчите во тимот се познаваме одлично и долги години игравме заедно. Наша прва цел е добра подготовка за двата дуели со Англија за пласман во главната фаза од квалификациите за ЕП. Македонија има квалитет да се избори за победа, иако во изминатиот период имавме и резултати кои не соодветствуаат на нашиот рејтинг. Тука сум да помогнам и се надевам дека мојот придонес ќе биде во функција на остварување подобри резултати на репрезентацијата, -истакна Ибиши.

Македонија во бараж мечот за влезот во главните квалификации за ЕП ќе се соочи со Англија, дуелите се закажани во периодот меѓу 2. и 11. ноември.