Ѓоковиќ најави напад на нови титули: Пред мене се уште неколку успешни сезони

Новак Ѓоковиќ славеше на Мастерсот во Париз и со тоа повторно потврди дека е најдобар тенисер на светот во овој момент.

Ова за Србинот беше 40. славје на турнирите од оваа категорија, вкупно 97 пехар во кариерата, но тука не планира да застане.

-Се трудам да бидам добар ученик на оваа игра и да бидам во чекор со бројките, но во исто време, сакам да го фокусирам моето внимание на следниот предизвик. Сè додека сум активен играч, тоа ќе биде менталитетот што ќе ме одржува. Го освоив ова, но веќе е зад мене. Секако дека сум горд на моето достигнување, но веќе вртам нова страница. За среќа или за жал, тоа ми функционира и психички одам напред. Затоа што се додека сум активен сакам да победувам уште повеќе и да продолжам да играм на највисоко ниво. Грен слем и мастерс се најважните турнири во нашиот спорт, -рече Ѓоковиќ кој сака да го собори рекордот на Џими Конорс.

-Зошто не би го соборил тој рекорд? Сега имам 12 помалку, но и уште неколку успешни тениски години. Се трудам да уживам во моментите кои сега значат повеќе и вредат двојно повеќе. Кога ќе се види во која фаза на кариерата сум, секој освоен турнир многу значи. Иако изгледа рутински, секоја победа на мастерс или грен слем многу ми значи, -порача првиот светски рекет.