Ѓоковиќ и донесе среќа на Звезда, „црвено-белите“ се уште се во игра за Топ 8 фазата (ВИДЕО)

Екипата на Црвена Звезда го одбрани домашниот терен и славеше над Валенсија со 92-73 во вечерашниот меч од 31. коло во Евролигата.

„Црвено-белите“ имаа голема поддршка од трибините, а во првите редови беше и големиот тениски ас Новак Ѓоковиќ. Сето ова знаеја како да го искористат избрнаиците на Ивановиќ и дојдат до славје со кое се уште ги задржуваат шансите за Топ 8 фазата, пласман во плејофот иако за да се случи тоа мора многу работи да се поклопат, наместат во завршните три рунди од регуларниот дел.

Петрушев со 20 поени и 7 скока беше најкорисен играч, Добриќ беше автор на 16, а Кампацо на 15 поени додаде и 7 асистенции. Радебо со 14 кошеви пак беше прв стрелец кај шпанскиот претставник.

И на останатите денешни дуели домаќините беа доминатни, па така Жалгирис го надигра Монако (79-70), Олимпијакос го доби Асвела (81-55), а Реал Мадрид го суреди Фенербахче со 90-75.