Џиролами му донесе второ место на ПСС Рејсинг во Ле Кастеле

Аргентинскиот возач Нестор Џиролами се најде веднаш зад победникот Мајк Халдер во втората трка од ТЦР Европа возена денеска на патеката Пол Рикар во Ле Кастеле крај Марсеј.

Двајцата возачи со идентични автомобили и донесоа 1-2 победа на Хонда, при што бодовите на Џиролами одат на контото на македонскиот тим ПСС Рејсинг, откако на неколку дена пред трката беше објавено дека француските власти нема да издадат потребни документи за учество на македонскиот возач Виктор Давидовски, па Џиролами во последен момент влезе како негова замена во оваа трка.

На вчерашната прва трка со која беше отворена сезоната од ТЦР Европа, Џиролами беше на петтото место, но се пожали на одредени проблеми со возилото кои беа надминати за денешниот настап.

Со ова Џиролами се најде на самиот врв, зад вчерашните победници Даниел Лојд со Хонда и Мехди Бенани со Ауди. Првиот има 69 бода, вториот 68, а Џиролами е трет со 66 поени, по што следуваат Кларе со 62, Филипи со 58, Халдер со 52 и Бекман со 48 бода.

Следните две трки се закажани на 12 и 13 септември на патеката Золдер во Белгија.