Данскиот селектор Јакобсен незадоволен од ждрепката: Не би избрал да сме во оваа група

Данска ќе биде фаворит во групата во која се најде македонската ракометна репрезентација во квалификациите за следното Европско првенство, но скандинавската селекција ќе мора на терен да ја оправда таа улога, посебно на гостувањето во нашата земја.

Дека актуелниот светски шампион не е премногу задоволен од исходот на денешната ждрепка потврдува и селекторот Николај Јакобсен, кој негодува за групата во која се најдоа и Швајцарија и аутсајдерот Финска.

– Ова е веројатно една од најлошите комбинации кои можевме да ги добиеме, дефинитивно не би сакал да сум во оваа група 7.

– Нема од што да се плашиме, но ако гледате кои противници можевме да ги добиеме, јас би преферирал да сме во група со Холандија и Полска. Единствена утеха ми е што досега не сум бил во Финска, а и ни одговара во однос на патувањето, – изјавил Јакобсен.

Македонија и Данска се соочуваат во за нас празничен период, откако ќе бидеме домаќини на 6 или 7 јануари, а три дена подоцна гостуваме во скандинавската земја.

Најдобрите две селекции од секоја група и четири третопласирани репрезентации ќе обезбедат учество на ЕП кое во 2022 година ќе се одржи во Словачка и Унгарија.