Артета избрал идеален напаѓач од редовите на лондонски ривал

Арсенал не успеа да го симне Манчестер Сити од тронот во Премиер лигата, но менаџерот Микел Артета останува оптимист дека следната сезона „топчиите“ ќе добијат нова и пореална шанса за такво нешто.

Главната разлика може да биде составот, односно засилувањата кои треба да донесат повеќе квалитетни играчи во ротација за шпанскиот менаџер.

Утринава, таблоидот „Сан“ излезе со вест дека Артета е голем фан на Каи Хаверц и ќе се обиде да го убеди Челси да го отстапи германскиот репрезентативец во преодниот рок, во кој и градскиот ривал има најавено голема реконструкција.

Самиот Хаверц размислува за збогување со „Стемфорд Бриџ“ иако има договор до 2025 година, па тоа му дава шанса на Арсенал да преговара за напаѓачот и условите под кои би го ангажирал во своите редови.

Медиумите досега го споменуваа и Реал Мадрид како заинтересиран клуб за Хаверц, но ако шпанскиот клуб не направи нешто конкретно, тогаш Арсенал сигурно ќе биде фаворит за потписот на 23-годишниот фудбалер.

Хаверц одигра 47 натпревари и постигна 9 гола во благо речено конфузната сезона на Челси.