Швеѓаните славеа во „малото финале“ и обезбедија олимписка виза за Париз

Селекцијата на Шведска е освојувач на бронзата на 16. Европско ракометно првенство што се игра во Германија.

Швеѓаните кои до вечерва се уште се актуелни европски прваци успеаа да слават над домаќинот со 34:31 на средбата во Келн. Скандинавците севкупно гледано беа многу подобри на соочувањето во „Ланксес Арената“ иако во вториот дел Германците им се заканија дека можат да направат нешто повеќе во оваа пресметка.

Избраниците на Солберг беа фуриозни во првите 30 минути кои ги реализираа со плус 6 (18:12), па токму таа позитива им овозможи да бидат помирни во продолжението иако Германците притискаа, се бореа до самиот крај, но Паличка и компанија се доволно искусни, квалитетни и ја завршија, заокружија започнатата работа.

Со ова Шведска обезбеди  директен пласман на ОИ во Париз. Паличка имаше 19 одбрани, додека Клар со 8 гола беше прв стрелец. На другата страна добар беше Ушчинс со 8 реализации.