Моќната Данска направи пресврт во Келн и закажа спектакуларно финале со Франција

Данска е синоним за врвен ракомет и веќе со години наназад стига до самите завршници на сите натпреварувања, па така ќе биде и на 16-то Европско првенство кое се игра во Германија.

Избраниците на Јакобсен вечерва имаа тешка задача против расположените Германци и многубројната публика во Келн, но иако во воведната фаза на мечот навистина се мачеа, сепак широката клупа им овозможи на Данците да направат пресврт.

Голманот Ландин немаше свој ден и во првиот дел беше една од најслабите алки во данскиот тим, а тоа го натера Јакобсен да направи промена, која заедно со внесувањето во игра на искусниот Хансен се покажа како клучна.

Германија го доби првиот дел со 14:12, но во продолжение квалитетот на Данска исплива на површина, каде посебно брилјираа голманот Нилсен, како и Хансен кој постигна пет погодоци.

Данска без многу потешкотии направи пресврт и покажа моќ како многупати досега, а со психолошката стабилност гостите направија на крајот да имаат мирна завршница и да остварат победа од 29:26.

Со ова, ракометниот свет дојде до завршен чин на Европското првенство и до финале кое беше за многумина очекувано, бидејќи во завршниот чин силите ќе ги одмерат велесилите Данска и Франција.