Металург го ангажираше црногорскиот пикер Канкараш

Ракометниот клуб Металург од денеска е посилен и за пикерот Бранко Канкараш, чиј трансфер е официјализиран само еден ден откако составот од „Автокоманда“ го најави и доаѓањето на искусниот Момир Рниќ.

Канкараш е црногорски репрезентативец кој досега настапуваше за Мешков Брест, што значи дека има искуство и во Лигата на шампионите и СЕХА лигата.

Претходно, 32-годишниот ракометар има настапувано и за Истр и Валанс во Франција, Мерсин во Турција и Војводина, Металопластика и Југовиќ на овие простори.

Канкараш ја засилува пикерската позиција во составот на Зоран Кастратовиќ, а таму конкуренција ќе му бидат сонародникот Лука Вујовиќ, како и Милан Лазаревски.