Јувентус со доминација во вториот дел го скрши отпорот на Лече (Видео)

Јувентус мораше да чека до второто полувреме, но го скрши отпорот на Лече и на крајот стигна до убедлива победа со резултат 4:0, во натпревар од италијанската Серија А.

Првото полувреме донесе неколку опасни закани од Лече, додека Јувентус првите вистински шанси ги имаше во завршницата кога домаќините преку Роналдо и Бернардески не реализираа чисти зицери.

Сепак, позитивно за „бјанконерите“ беше црвениот картон кој го заработи Лучини, а таа предност беше валоризирана во вториот дел кога Дибала со уште еден убав погодок го отвори резултатот во 53. минута.

Речиси десет минути подоцна, Роналдо изнуди и реализираше пенал, а ако постоеше неизвесност, таа беше елиминирана откако Португалецот испрати втора асистенција вечерва, а нововлезениот Игуаин зголеми на 3:0.

Последниот гол беше дело на Де Лихт, со што Јувентус ја заокружи убедливата победа со 4:0, додека Лече ќе мора да се концентрира на следните натпревари, кои ќе одлучуваат за опстанокот на оваа екипа во Серија А.