Голем успех: Начевски и Николов ќе го судат финалето на Олимписките игри

Македонската судиска двојка Ѓорѓи Начевски-Славе Николов ќе го суди големото финале на ракометниот олимписки турнир во Токио.

Нашите реномирани судии добиваат голема чест и одговорност од ИХФ, со тоа што ќе ја делат правдата на натпреварот меѓу Франција и Данска, на кој ќе се решава која репрезентација ќе ги освои златните медали.

Начевски и Николов постојано добиваа дерби натпревари во текот на олимпискиот турнир, вклучувајќи ги дуелите Шпанија-Норвешка, Германија-Франција, Франција-Норвешка, како и дуелот меѓу Франција и Данска.

На Данска и судеа на дуелот со Португалија во групната фаза, а делеа правда и на четвртфиналето меѓу Германија и Египет.

Финалето Франција-Данска се игра утре од 14 часот.

Македонија ќе има уште еден претставник на завршните натпревари на Олимпијадата, откако Драган Начевски ќе биде делегат на дуелот за бронза меѓу Шпанија и Египет.