Димевски ја доби довербата и останува на чело на МОК (ФОТО)

Даниел Димевски и во иднина ќе биде прв човек на Македонскиот олимписки комитет (МОК).

Тој на денешното редовно изборно собрание кое се одржа во Спортскиот центар „Јане Сандански“ во Скопје доби мнозинство на гласови и останува претседател на МОК.

Димевски ја доби довербата од 45 присутни делегати (членки) (8 беа против, 2 воздржани), бројка која беше повеќе од доволно за да обезбеди нов четиригодишен мандат.

-Благодарам на поддршката, бројка на гласови која носи и голема одговорност. Сакам следниот пат да бидеме сите на иста страна. Многу ми е жал што во процесот истрпевме ситуации кои не се добри. Ние што сме тука не сме многу, малку сме, меѓутоа мораме да бидеме компактни. Ако се држиме силно, никој ништо не ни може.

-Јас сум фајтер, ве имам сите вас, сум ве испочитувал и можам да ве погледнам во очи. Време е сега сите да запнеме и да го смениме Законот за спорт и да станеме посилни. Сите идни директори да стојат мирно пред нас и ние и вие го правиме спортот, а не директорите, -порача Димевски кој на оваа фунцкија го наследи легендарниот Васил Тупурковски.