Црвена Звезда подготви уникатен перформанс во чест на Михајловиќ (Видео)

Црвена Звезда денеска не успеа да ја победи Војводина во српското фудбалско дерби, но натпреварот мина во знакот на легендата на овие два клуба, Синиша Михајловиќ.

Неодамна починатиот поранешен фудбалер и тренер ќе биде запаметен од фудбалската јавност по своите човечки и фудбалски квалитети, а денеска белградскиот клуб реши да му оддаде чест на својот стадион.

Црвена Звезда приреди интересен перформанс во чест на Михајловиќ и може да се каже дека со право заработи комплименти за она што беше видено на центарот на стадионот „Рајко Митиќ“.

Михајловиќ во фудбалската кариера првите забележителни настапи во југословенската лига ги имаше во дресот на Војводина, за потоа да се пресели во Црвена Звезда со која стана европски првак заедно со нашите Дарко Панчев и Илија Најдоски.