Чупиќ ја инспирираше Хрватска за голем пресврт против Португалија

Хрватската ракометна репрезентација го искористи настапот на инспирираниот Иван Чупиќ за голем пресврт на дуелот со Португалија (25:24) и приближување до место кое води на Олимписките игри во Токио.

Португалците на полувреме имаа плус четири, во вториот дел стигнаа и до шест голови предност, но Хрватска успеа да направи пресврт во Монпелје и забележа многу важна победа против директниот ривал за едно од првите две места во групата.

Чупиќ одигра уште еден перфектен натпревар за својата репрезентација, а најмногу благодарение на него, хрватската селекција имаше одличен финиш.

Крилото на Вардар го заврши натпреварот со 9 голови и без промашување, а најблиску до него биле Циндриќ и Мандиќ со по 4 погодоци.

Хрватска треба да се надева дека Франција нема да загуби утре против Португалија и да го победи Тунис за сигурен пласман во Токио.