Тен Хаг не штедеше комплименти за спасителот Санчо, но му испрати и едно предупредување

Манчестер Јунајтед не изгледаше како тим кој може посериозно да му наштети на Лидс Јунајтед по негативата од 0:2, се до влегувањето во игра на Џејдон Санчо кој го имаше својот прв меч во Премиер лигата после неполни четири месеци.

Санчо одигра 30-тина минути и го прикажа сиот свој потенцијал во овој период, односно потсети на најдобрите денови од Борусија Дортмунд, форма поради која беше и скапо платен од раководните структури на „Олд Трафорд“.

Џејдон одлично комбинираше со своите соиграчи и го постигна голот за 2:2 против Лидс, а по натпреварот доби големи пофалби од Ерик Тен Хаг, кој сепак му испрати и едно предупредување.

– Потребна ни беше друга динамика во второто полувреме и со Санчо се вративме во мечот. Многу сум среќен за него, тој дефинитивно се врати. Сите знаеме дека тој е извонреден играч, сметаме дека може да биде многу влијателен за нас.

– Сепак, мора да продолжи да работи, не смее да застане сега. Со напорна работа ќе продолжи да се мотивира. Навистина уживав во ова реми, посебно поради него. Сметам дека ќе излезе многу посилен од ова. Тој е на вистинскиот пат, но мора да продолжи да работи. Мора уште повеќе да работи и да ни помогне да ги оствариме нашите цели, – изјави Тен Хаг.