Талентираниот Андоноски „скокна“ во првата екипа на МЗТ Скопје

Најдобриот македонски кошаркарски колектив, МЗТ Скопје продолжува да го гради составот за натпреварувачката 2022/2023 во која клубот од Аеродром ќе има многу предизвици како на домашната така и на меѓународнаат сцена каде ќе настапува во најсилната АБА лига.

Најнов член на „металците“ е талентираниот Андреј Андоноски кој ќе го носи „сино-белиот“ дрес до 2025 година со можност за продолжување на соработката. Андоноски доаѓа од втората екипа на МЗТ или поточн прави скок во кариерата и ќе настапува во најсилниот тим предводен од Александар Петровиќ.

Андреј иако има 20 години веќе има собрано и пет настапи за сениорската репрезентација на Македонија, а претходно беше еден од лидерите на кадетската, јуниорската и на младинската репрезентација со која летово настапи на Европското првенство-дивизија Б во Тбилиси.

МЗТ во моментов ги има на располагање уште Дамјан Стојановски, Адем Мекиќ, Бојан Крстевски, Дамјан Робев, Бре Ајви, Мајк Кафи и Еван Максвел, Страхиња Миќовиќ, а тука се и талентираните Димитар Иванов, Бојан Величковски и Марко Спасовски.